叮叮！叮叮！得閒搭吓叮叮港島遊，又平又懷舊都唔錯㗎！依家仲可以有埋藝術feel㗎！香港電車有限公司(香港電車)噚日就推出首架裝置藝術電車，為乘客嘅旅程加多幾分驚喜添！

 「齊來尋找110號電車」，噚日起至6月中，110號電車會由一般嘅載客叮叮，變身做具新派復古風格嘅「流動照片館」，車廂內掛滿由世界知名攝影師K-narf拍攝嘅百幾張、以香港街頭美食同街市為主題嘅照片，好有地道風味。所有嘅相片都係K-narf喺展出前幾日，佢走訪大街小巷拍攝，然後以特製嘅鋁質膠帶裝置喺車廂入面嘅！

香港電車董事總經理魏文話，同K-narf合作嘅作品主要突顯香港文化，將昔日嘅記憶同今日嘅面貌相映對照，呢個亦係電車110周年「裝載你我，映照生活」主題背後嘅精神，遲啲仲有其他主題嘅藝術裝飾，希望可以帶畀乘客更多驚喜。

咁有藝術嘅叮叮，大家唔單止要試搭喇！記住見到110電車經過時，都要望多眼喎！咪走寶㗎！

(2015-5-5  都市日報)