小朋友隨時隨地都精力充沛，要讓他們盡情放電，就要為他們安排些活動，讓他們任跑任跳，發放用不完的精力。撞正荃新天地現正舉辦嘉年華，設有多個超大型遊戲裝置，有如小型AIA嘉年華，小朋友見到立即雙眼發光！就連平日斯斯文文的正昊，去到都立即捉住媽媽周圍玩，希望玩個夠！

嘉年華分為1期中庭、戶外花園和2期，最引人注目必定是設立於花園的9米高體感夾蛋機，可惜拍攝當日下着大雨，設施暫時關閉。幸好1期中庭仍有不少室內遊戲，其中2個考眼界的攤位遊戲，小朋友要拿着大槍射走浮在半空中的膠蛋和黃色膠鴨，考驗眼力之餘又要手腳協調，絕對不容易！之後到小男孩見到必定尖叫的「奇趣掘蛋樂」，讓小朋友們變身掘路工人，控制小型掘地車，將膠蛋送到籃上。還有「宇宙小巨蛋」，蛋形的吹氣裝置夠晒大，而且蛋中有蛋，裏面可以拋波又黃金射球，小朋友們都玩到唔捨得走。

探秘大白鯊

玩完1期的遊戲，不妨到2期向高難度挑戰，玩盡更大型的吹氣裝置。到達後最先看到的必然是「深海奧秘」，小朋友要先爬上25呎高的梯級，再從鯊魚口滑出，少點膽識都做不到！難得正昊完全不怕，完成後更擺出Man爆大隻佬甫士！另外再玩埋「奇幻森林世界」，小朋友要好像軍人一樣跨過所有障礙，完成獵蛋目標，玩完後特別有成功感。最後可以玩埋「空中堡壘」先走，於吹氣城堡中任跑任跳，更可以學正昊表演大字形跳法，勁！

荃新天地「海陸空」獵蛋奇兵

日期：即日至4月4日

時間：11am-7pm

地點：荃灣荃新天地1期及2期中庭

查詢：8203 3323

(2016-4-1  都市日報)