《黑癲鵝先生》 (Mr. Popper's Penguins)及《呢班波士仲抵死》(Horrible Bosses 2)幕後搞笑精英尚安達斯(Sean Anders)及尊莫理斯(John Morris) ，再度拍檔打造爆笑喜劇《左一爸右一爸》(Daddy’s Home)，以一屋兩爸為題材，講述兩個大男人，為了贏取老婆仔女的歡心，各師各法，結果鬥出笑料成籮。

家有兩爸點算好？

家有兩爸，究竟是好事抑或壞事？父愛多啲，禮物多啲，零用錢多啲；但弊在麻煩都多啲！日日家嘈屋閉，仲要同阿媽一齊做夾心人！麥克華堡(Mark Wahlberg)在《賤熊》(Ted)系列幽默喜劇感大爆發，演得抵死生鬼，全球好評如潮。今次他與兩度提名金球獎，一向行喜劇路線的韋爾法路(Will Ferrell)合作，相信會激發更多他的喜劇細胞！

生父繼父鬥出新穎喜劇

現今社會離婚率高企，屋企有個繼母或繼父一啲都唔出奇，有繼母出現嘅影視作品更加不計其數，至於講繼父嘅電影就好似鮮有聽聞。但今次《左一爸右一爸》(Daddy’s Home)就少有咁打正旗號將一屋兩爸嘅喜劇故事搬上大銀幕。大家有冇諗過當一個好錫繼子女嘅爸爸遇上繼子女嘅親生爸爸會發生咩事？情況可能隨時尷尬過見親家，監製兼編劇之一嘅拜仁賓斯(Brian Burns)就話有親身經歷，而呢齣戲嘅靈感就正正由此而嚟。

麥克華堡大騷喜劇細胞

兩度提名金球獎嘅喜劇紅星韋爾法路(Will Ferrell)嘅喜劇片不嬲都為人所津津樂道，今次除咗親身上陣做主角兼任監製外，更搵嚟兩度獲得金像獎提名嘅麥克華堡(Mark Wahlberg)齊齊鬥戲。大家咪以為麥克華堡大大隻好威猛咁淨係識做一啲嚴肅嘅角色，睇過《賤熊》(Ted)系列嘅觀眾就知道，佢嘅喜劇細胞一啲都唔可以睇小。今次兩人係戲中分別飾演繼父同生父，兩個大男人為咗討得老婆仔女歡心，樣樣都要鬥餐懵，上映一場又一場幽默抵死嘅「好爸爸競賽」，率先係2016年帶畀觀眾前所未有嘅溫馨笑料。

兩度合作互笠高帽

唔講唔知，原來韋爾法路同麥克華堡已經係第二次合作，之前兩人喺《喪爆型警》(The Other Guys)中飾演刑警拍檔，今次就啱啱相反，飾演一對鬥氣冤家。提到今次嘅合作，兩人都互笠高帽。韋爾法路就話，一開始大家都猶疑緊究竟由佢做邊個角色好，但一諗到麥克華堡，大家都心裡有數，彷彿生父呢個角色係為麥克度身訂造，因為佢本身已經咁型咁自然，其他人可能學一世都學唔到。麥克華堡就回敬話，一知道有機會再同咁有喜劇才華嘅韋爾法路合作，諗都唔諗就一口答應，更謂兩人嘅合作充滿火花，希望觀眾睇到最後會兩個角色都鍾意。

小演員可愛自然

除咗一對爸爸嘅爆笑演出，一對小演員斯嘉麗愛思特維絲(Scarlett Estevez)同奧雲華卡路(Owen Vaccaro)嘅表現亦都十分值得留意。佢地得意可愛之餘，仲演得好自然，一啲都唔似做緊戲，難怪兩個爸爸為咗佢地要鬥生鬥死啦！諗真啲，其實夾係兩個老豆同仔女中間嘅媽媽先係最頭痕嗰個，而呢個咁考功力嘅角色就交由影視兩棲嘅荷里活魅力女星琳達卡黛里妮（Linda Cardellini）演出。佢演過多部著名電視劇，包括屢獲艾美獎嘅美劇《仁心仁術》（ER）同《廣告狂人》(Mad Men)。此外，仲有好多實力演員落力演出，如曾經憑《酒佬日記》(Sideways)獲金像提名嘅湯馬斯赫頓卓治(Thomas Haden Church)、《情迷藍茉莉》(Blue Jasmine)波比簡拿威(Bobby Cannavale)等，勢要令觀眾笑破喉嚨！

燥爸有型  貓爸溫馨  全家煩到頭都爆！ 

個性溫和的電台主管Brad(韋爾法路飾)，自與夢中女神Sarah新婚開始，就千方百計與她兩個子女打好關係，務求做個一百分的繼父。經過多番努力，眼看生疏的親子關係日漸有起色的同時，孩子們的親生父親Dusty(麥克華堡飾)竟突然到訪，還要在他家中住下來！Dusty雖然游手好閒，性格不羈勇悍，但卻是個風趣幽默的時尚型男，從外型到性格，都把Brad比了下去；加上血濃於水，極得一對子女的歡心。Brad為了捍衛自己在子女心目中的地位，默默向Dusty展開一場「誰是好爸爸」的競賽！

左一爸右一爸

導演 ：尚安達斯

演員 ：韋爾法路、麥克華堡

片長 ：96分鐘

級別 ：IIA

語言 ：英語 (中文字幕)

電影預告 : https://youtu.be/KL8NAvmDK0M